法證先鋒VI丨陳庭欣因獲佳導欽點演狠毒奸角 鄭衍峰凍到震波驚動蔡潔
撰文: TOPick柴犬出動
發布時間: 11 小時前
▲ 《法證先鋒VI:倖存者的救贖》陳庭欣
【法證先鋒VI / 陳庭欣 / 鄭衍峰】TVB劇《法證先鋒VI:倖存者的救贖》(下簡稱《法證先鋒6》)在昨晚(9月11日)劇情內,女主角之一的Nana(蔣祖曼飾)身陷險境。
一直遭前男友李啟(鄭衍峰飾)糾纏的Nana,原本打算歸還男方所有之前贈送的現金及禮物與對方劃清界線;不過李啟在Nana準備攤牌前離奇死亡,Nana亦同告失蹤。幾經調查,井Sir(袁偉豪飾)及余Sir(黃宗澤飾)等揭發事件與李啟家姐李玥(陳庭欣飾)有關。
法證先鋒VI丨陳庭欣向「闊太專業戶」林漪娸偷師 TVB小花鄧美欣首次演死屍
法證先鋒VI丨鄭衍峰演活「媽寶」二世祖
原來李玥為了繼承家業,竟冷血至親手殺死親弟,還計劃一併殺掉Nana及其腹中塊肉,以摒除所有和她爭家產的障礙。最終李玥遭繩之於法,余Sir則在寶樂(馮皓揚飾)協助下將Nana救出。
之前,為巴黎奧運擔任駐當地主持兼獲得不少好評的鄭衍峰(Leonard),這次罕有地在劇集中佔戲頗重,且角色相當立體兼有發揮。一心只想好好戀愛的李啟,本身已是欠果斷及自信的「媽寶」二世祖,整天不但開口埋口就是「媽媽」及「Nana」,性格亦相對軟弱及賴皮,是明顯不討喜的類型。
法證先鋒VI丨放鬆演繹角色
由於Leonard選擇以較溫和的方法演繹角色,加上性格單純無害,故仍成功贏得不少網民支持,讚Leonard演「戀愛腦二世祖」零違和外,又指他演技超出預期:「有錢仔做得幾好」、「真係幾似裙腳仔」、「煩得嚟又憎佢唔落」。
談到新劇角色戲份重,Leonard笑言是首次拍劇有感情線,並謂當知道對手是蔣祖曼後即放心不少:「雖然未同佢合作過,但都知佢好有經驗同埋好好人。同埋真正埋位時,因為劇本經常要改,Joman會即時同我再分析劇本、睇吓我哋兩個應該點演,真係好多謝佢。另外都要多謝我媽媽漪娸姐,佢喺現場會幫我執應該點演,仲教我點樣演繹一個煩得嚟又令人鍾意嘅二世祖,佢真係教咗我好多。」
Leonard續指,當初是總監製鍾澍佳(佳導﹏找他演李啟這個角色:「佢話想我做裙腳仔。」他又補充由於感覺角色較單純及不喜歡思考,故事前沒為角色設計太多細節及小動作:「我主力都係放鬆同放空去做好個角色,唯一叫度過嘅嘢,就係嗌漪娸姐做媽媽。本身劇本寫係嗌媽咪,但我喺現場同監製小龍同埋佳導商量過,覺得既然李啟係媽寶,好似嗌媽媽再感覺裙腳啲,一個30歲嘅男仔仲成日媽媽、媽媽、媽媽咁,咁樣個感覺好似出啲。」
法證先鋒VI丨感受「冰火五重天」
至於解剖戲場口,Leonard拍攝前後原來意外地經歷了「冰火五重天」:「拍之前我咁啱請咗幾日假去峇里出席何依婷嘅婚禮,嗰度成30幾40度。跟住我一返嚟第二朝就怕呢場戲,嗰日正正係12月尾、得10度左右,一來我要唔著衫畀5個化妝師由頭化屍體妝化到尾,一化化足2個半、3個鐘,好彩當時係開晒暖氣嘅。到真係拍嗰時要瞓上塊鋼板時,嘩!因為扮死屍要閉氣,但又凍喎,凍又會震喎,所以每閉氣15秒都要Cut一Cut,蔡潔都有忍唔住話你個心口係咁喺度震喎,我話係呀,真係太凍喇。」
Leonard又謂很開心今年既能參與巴黎奧運、亦獲得一個如此有發揮的角色,並笑言希望挑戰奸角:「今年係幾豐收嘅,希望劇集度都可以有唔同嘅嘗試。」
法證先鋒VI丨演奸角有驚喜
而陳庭欣(Toby)雖然只是飾演單元主角李玥,但一樣過足戲癮,除全程保持霸氣及偶爾外露奸險樣,昨晚更先後上演狠心殺人、及對著下屬極速變臉游走「冷酷」與「開心勝利」之間,同樣有發揮。
甚少飾演奸角的Toby,笑言是次有份參演《法證先鋒6》並飾演壞女人,原來是因為佳導看了她之前在電影《女子監獄》中的演出:「有一日喺event撞到佳導,佢話佢有睇套戲,佢仲話因為我入面做嘅角色好唔係我、豁晒出去,所以今次就搵我做奸角,我聽到都覺得幾驚喜。」
在司儀及主持工作與Leonard合作無間的Toby,笑言是次與對方再合作拍劇依然感覺新鮮:「我同佢都係合作主持多,初初『綑』埋感覺都好得意,因為我哋都擔心講嘢太過主持Tone,好彩出嚟Feedback都ok。」
最新影片推介:郭珮文專訪
HKET App已全面升級,TOPick為大家推出一系列親子、健康、娛樂、港聞及休閒生活資訊及影片。立即下載︰https://onelink.to/f92q4m
追蹤TOPick WhatsApp頻道睇最新資訊︰http://tinyurl.com/3dtnw8f5